Pasa a folla: Termos esenciais de dereito do traballo e da seguridade social

O Cartafol

"Termos esenciais” é unha colección de glosarios trilingües (galego-español-inglés) especializados nos distintos ámbitos de coñecemento implicados na docencia e na investigación universitaria. A Facultade de Dereito da Universidade de Santiago de Compostela promoveu hai anos o programa  “Témoslle lei”, para aumentar e mellorar o uso do galego neste centro docente. Encadrado neste plan figura o apoio terminolóxico especializado, entre outras accións, coa edición de glosarios do dereito. O derradeiro volume co que se pecha esta sub-colección é o Termos esenciais do dereito do traballo e da seguridade social. Con anterioridade xa foran publicados os volumes referidos ao dereito constitucional, penal, internacional, civil, administrativo e mercantil, así como de Criminoloxía.

Alicia Villalba, profesora da Facultade de Dereito, e Xusto Rodríguez, técnico do Servizo de Normalización Lingüística, son os autores de Termos esenciais de dereito do traballo e da seguridade social, que recolle 1110 conceptos desta disciplina. Esta compilación non se limita á vertente contractual, senón que tamén repara nas relacións colectivas e no dereito da seguridade social, cuestións básicas para comprender o sistema de protección social establecido ao longo do século pasado, segundo sinalan os seus autores.

A nivel estrutural, este glosario, do mesmo xeito que acontece con outros glosarios da colección, está dividido en dous grandes bloques: os termos esenciais, que aparecen ordenados alfabeticamente pola súa denominación en galego, e os índices alfabéticos en español e inglés. O bloque dos termos esenciais tamén distingue dúas partes diferentes agrupadas nas entradas completas, onde se compila e se organiza toda a información recollida para cada un dos conceptos tratados,  e nas entradas remisivas, onde se recollen unicamente sinónimos ou variantes das entradas completa.

Para traballar satisfactoriamente co volume débese ter en conta que as dúas partes remiten entre si mediante a numeración, facilitando o acceso a toda a información recollida con independencia da lingua que se empregue na busca. Deste xeito, non só podemos saber as correspondencias en castelán e inglés a partir do termo galego nos casos de acollemento familiar, base reguladora, central sindical, deber de dilixencia, expediente contraditorio, gastos de manutención, ineptitude sobrevida, pacto de exclusividade, servizos de boa veciñanza..., senón tamén buscar polos respectivos termos en castelán e inglés.

A consulta deste novo traballo pode facerse a través da súa edición física, que será distribuída entre o profesorado e o alumnado, ou da súa edición dixital, como aconteceu cos volumes anteriores. Cómpre lembrar que se editan baixo licenza Recoñecemento-CompartirIgual 3.0 de Creative Commons Ademais, cada un dos 1110 termos xa están incorporados no bUSCatermos, a base de datos terminolóxica plurilingüe en aberto da nosa universidade.

Este novo repertorio terminolóxico presentouse o pasado xoves, 18 de outubro, na Facultade de Dereito. Nela participaron Alicia Villalba e Xusto Rodríguez; o vicerreitor de Planificación e Proxección Estratéxica da USC, Gumersindo Feijoo; o secretario xeral de  Política Lingüística da Xunta de Galicia, Valentín García; e o decano da facultade, Gumersindo Guinarte.

??? Author ???