Novas normas UNE en galego

Que son as normas UNE?

As normas UNE son un conxunto de normas técnicas que indican como debe ser un produto ou como debe funcionar un servizo para que sexa seguro e responda ao que o consumidor espera del. Xa que logo, están relacionadas coa mellora da calidade dos produtos e servizos das empresas, coa normalización e certificación.

Elabóranas por consenso os comités técnicos de normalización (CTN), que adoitan estar formados por unha entidad nacional de acreditación, fabricantes, consumidores e usuarios, administración, laboratorios e centros de investigación.

De entrada, é voluntario o cumprimento destas normas; mais as administracións competentes pódenas facer obrigatorias mediante leis, decretos, regulamentos ou esixindo o seu cumprimento nos pregos de prescricións técnicas dos proxectos. Por outra banda, é innegable o interese de empresas e institucións por contaren cunha certificación de calidade baseada no cumprimento desats normas.

No contexto español o organismo encargado do desenvolvemento e a difusión das normas técnicas, así como da certificación do seu cumprimento, é AENOR (Asociación Española de Normalización y Certificación), que conta cun catálogo de case 29 000 documentos normativos. No Boletín Oficial do Estado (BOE) infórmase mensualmente de todas as novidades en canto ás normas UNE-ISO. Porén, os textos das normas cómpre mercalos en AENOR.

Normas UNE en galego

A mediados da década pasada Aenor, en colaboración coa Xunta de Galicia, publicou dez versións oficiais en galego dalgunhas normas UNE-ISO, mais esa colaboracion detívose en 2009. O pasado ano 2015 Aenor asinou un convenio de colaboración coa USC para volver publicar normas UNE no noso idioma. Os primeiros resultados, froito da tradución realizada polo Servizo de Normalización Lingüística (SNL) da USC, son tres normas, das de maior proxección de todas as comercializadas por Aenor -supoñen case o 20% do seu volume de vendas-, que xa están dispoñibles no catálogo de Aenor: 9001:2015 Sistemas de xestión da calidade. Requisitos; 9004:2009 Xestión para o éxito sostido dunha organización. Enfoque de xestión da calidade; e 14001:2015 Sistemas de xestión ambiental. Requisitos con orientación para o seu uso,  que xa están dispoñibles na súa versión en galego no catálogo Aenor.

Aenor, ademais, para fomentar a utilización destes documentos en galego, ofrece vantaxes e descontos. Por outra banda, estas normas pódense descargar de balde desde calquera equipo conectado á rede da USC.

Daquela, o repertorio de normas UNE en galego está formada por:

• UNE-EN ISO 9000:2005. Sistemas de xestión da calidade. Fundamentos e vocabulario
• UNE-EN ISO 14001:2004. Sistemas de xestión ambiental. Requisitos con orientación para o seu uso
• UNE 166001:2006. Xestión da I+D+i: requisitos dun proxecto de I+D+i 
• UNE 166002:2006. Xestión da I+D+i: requisitos do Sistema de Xestión da I+D+i
• UNE 175001-1:2004. Calidade de servizo para pequeno comercio. Parte 1: requisitos xerais
• UNE 175001-2:2004. Calidade de servizo para pequeno comercio. Parte 2: requisitos para peixarías 
• UNE 175001-3:2005. Calidade de servizo para pequeno comercio. Parte 3: requisitos para ópticas 
• UNE 175001-4:2005. Calidade de servizo para pequeno comercio. Parte 4: requisitos para carnizarías e chacinarías 
• UNE 175001-5:2005. Calidade de servizo para pequeno comercio. Parte 5: requisitos para florerías
• UNE-ISO/IEC 27001:2007. Tecnoloxía da información. Técnicas de seguridade. Sistemas de Xestión da Seguridade da Información (SXSI). Requisitos. (ISO/IEC 27001:2005)
• UNE 9004:2009 Xestión para o éxito sostido dunha organización. Enfoque de xestión da calidade
• UNE 9001:2015 Sistemas de xestión da calidade. Requisitos
• UNE 14001:2015 Sistemas de xestión ambiental. Requisitos con orientación para o seu uso

??? Author ???