Dicionario Multilingüe da Ciencia do Solo

Este ano que andamos é o Ano Internacional dos Solos e o Día da Ciencia en Galego, o 4 de novembro, está dedicado tematicamente ao solo e ao xeólogo Parga Pondal. Non quedaba outra que dedicar esta sección ao Dicionario Multilingüe da Ciencia do Solo.

O Dicionario Multilingüe da Ciencia do Solo é unha iniciativa da Sociedad Española de la Ciencia del Suelo (SECS), que conta coa participación da Sociedad Latinoamericana de la Ciencia del Suelo, así como coa colaboración do Termcat, do Institut d’Estudis Catalans (IEC), da Real Academia Galega (RAG) e da Real Academia Española (RAE). Trátase dun dicionario terminolóxico en liña, con acceso aberto, con entradas separadas en catalán, español (con americanismos), galego e portugués (con americanismos), e con equivalencias en inglés e francés en todos os casos.

Accédese a través dunha páxina web. O contido fundamental, o propio dicionario, está dispoñible no cuarto superior da páxina, a través de catro caixas. Así pódese facer buscas por entradas se se quere buscar un termo concreto, pero tamén se pode buscar na definición, por sinónimos e por termos relacionados (aínda que non todas as entradas teñen). Igualmente se pode procurar por idiomas, de xeito que as entradas resultantes se ordenan pola lingua elixida. O campo Idioma é un menú despregable no que aparece o «español» por defecto mais onde se pode seleccionar calquera das outras linguas.

Tamén se pode facer buscas por área temática, aínda que arestora só está dispoñible, con seiscentas entradas, a correspondente ás propiedades físico-químicas, químicas e comportamento do solo. Finalmente, tamén se poden acotar as buscas en función de que sexa unha palabra, un fragmento de palabra ou unha partícula a buscar, e cun despregable ábrese as posibilidades de que ese fragmento sexa polo que comece, remate ou sexa parte do termo buscado.

Ao facer unha busca o resultado será unha ou varias fichas que nos ofrecerán en primeiro lugar, o termo e a súa información gramatical, seguido da área ou áreas temáticas a que pertence, a definición, notas e equivalencias nos outros idiomas do dicionario. A interface divídese nunha zona dereita, de fichas, e outra esquerda, de entradas para facilitar a localización en caso de listas amplas de termos.

O web inclúe ademais, información sobre a autoría, as áreas temáticas que abarca, abreviaturas e bibliografía.

Autoría e antecedentes

O Dicionario está a ser elaborado por ámbitos de especialidade da Ciencia do Solo. A versión en galego está coordinada polo profesor da USC Eduardo García-Rodeja e o profesor e membro da Real Academia Galega Francisco Díaz-Fierros supervisa o traballo lexicográfico.

O Dicionario ten como antecedente o Vocabulari multilingüe de la ciència del sòl (edición en liña de 2010) e a obra publicada pola Universitat Politècnica de Catalunya no ano 1989, o Lèxic de la ciència del sòl, que permitiron identificar os termos utilizados en Ciencia do Solo, polo que o Dicionario Multilingüe da Ciencia do Solo amplía o número de entradas, de áreas de especialidade e inclúe as definicións.

??? Author ???

Mércores, 28 de outubro de 2015