Termos esenciais de administración electrónica

A administración electrónica supón unha oportunidade para mellorar a eficiencia e a calidade dos servizos das administracións públicas, sempre que non se limiten a trasladar mimeticamente os procedementos administrativos actuais ás tecnoloxías da información e as comunicacións (TIC), e se introduzan os cambios organizativos necesarios para orientarse cara aos usuarios e usuarias. Polo tanto, a administración electrónica é un concepto amplo, que nos obriga a reformular a maneira habitual de traballar, a simplificar os procedementos e, en definitiva, a cambiar a mentalidade da administración.

En plena fase de desenvolvemento da administración electrónica na USC, o Servizo de Normalización Lingüística editou en novembro pasado Termos esenciais de administración electrónica, que inclúe definicións e clasificacións de 164 conceptos cos seus nomes en galego, catalán, español, inglés e francés, co fin de asentar desde este primeiro momento unha terminoloxía galega de referencia que se implemente neste proceso de cambio.

Este glosario parte da Terminologia oberta de la Administració electrònica do TERMCAT (centro de terminoloxía da lingua catalá). A partir da definición e clasificación de 164 conceptos cos seus nomes en catalán, español, inglés e francés) a Área de Terminoloxía do SNL, a través do seu técnico, Xusto Rodríguez Río, engadiu os equivalentes en galego e reelaborou as definicións para esta lingua.

Fixa deste xeito termos como pasarela de pagamento, sinatura electrónica, formato de sinatura,fenda dixital, (des)cifraxe ou valixa electrónica, e aclara coas súas definicións e equivalencias conceptos distintos, como aseguramento de datos e protección de datos.

Dada a complexidade da materia, os conceptos remítense a áreas tan diversas como a calidade e a planificación estratéxica, as infraestruturas tecnolóxicas, o procedemento administrativo, a seguridade ou a tramitación electrónica.

Coma sempre nesta colección, o vocabulario divídese en dúas partes. A primeira son propiamente os «termos esenciais», ordenados alfabeticamente pola súa denominación en galego, aos que se lles engade a correspondente información gramatical, a súa adscrición á árbore de campos, a definición e a as equivalencias en castelán, catalán, francés e inglés. A segunda son as listaxes de denominacións nestes idiomas para eses 164 conceptos, numeradas para remitir á denominación galega. Deste xeito, é doado acceder a toda a información deste glosario con independencia da lingua de partida.

Pódese consultar en formato .pdf, a través do andel de terminoloxía do SNL, o que permite manexalo en ordenadores e dispositivos de lectura electrónica e tamén a través de bUSCatermos, a base de datos terminolóxica multilingüe e aberta da nosa universidade, que incorpora toda a terminoloxía producida no SNL da USC, entre outras achegas.

Termos esenciais de administración electrónica constitúe a duodécima obra da colección “Termos esenciais”, e o número 32 da totalidade dos repertorios terminoloxicos do SNL

Luns, 02 de febreiro de 2015