Novos vocabularios de dereito administrativo, redes sociais e biocarburantes

A falta do último trimestre, neste ano temos tres novos repertorios terminolóxicos en que o galego está presente para tres ámbitos ben variados: o dereito administrativo, as redes sociais e os biocarburantes.

Termos esenciais de dereito administrativo

Termos esenciais de dereito administrativo é o quinto volume da colección “Termos esenciais”, da USC, dedicada especificamente ao ámbito do Dereito. Recompila 1081 conceptos propios do dereito administrativo xeral como licenza, poxa, requirimento, danos e perdas, etc. que presenta na súa versión en galego cos equivalentes en castelán.

Pódese consultar na súa edición en papel, que se distribuirá entre o profesorado e o alumnado da Facultade de Dereito en formato .pdf, o que permite manexalo en ordenadores e dispositivos de lectura electrónica. Ademais, a obra difúndese baixo a licenza Recoñecemento-NonComercial 3.0 de Creative Commons. Cómpre lembrar que bUSCatermos, a base de datos terminolóxica multilingüe e aberta da nosa universidade, incorpora toda a terminoloxía que abrangue este repertorio, polo que tamén o podes consultar aí.

O novo vocabulario foi elaborado polos docentes especialistas en dereito administrativo Teresa Carballeira Rivera, Andrea Garrido Juncal, Fernando Adolfo de Abel Vilela e Luís Miguez Macho, baixo a coordinación da profesora Alba Nogueira López e do técnico do SNL Xusto A. Rodríguez Río.

O glosario forma parte do plan de normalización da Facultade de Dereito Témoslle lei para aumentar e mellorar o uso da lingua galega no centro, dentro da liña de accións para resolver as dúbidas terminolóxicas que poidan dificultar o uso do galego por parte de docentes e estudantes, a cal xa deu pé á publicación dos anteriores Termos esenciais de dereito constitucional, penal, internacional e civil. Xa se está traballando no de mercantil.

Léxico panlatino dos biocarburantes

A actualidade dos biocarburantes por mor da diminución das fontes de produción de enerxía fósil, da volatilidade do prezo do petróleo e da pegada ecolóxica deixada polas fontes de enerxía tradicional, levou á Rede panlatina de terminoloxía (Realiter) a propoñerse elaborar o Léxico panlatino dos biocarburantes.

As máis de 300 entradas de que consta foron escolmadas e establecidas en francés e inglés a partir do exame minucioso de documentos técnicos e monografías pola Oficina da Tradución do Ministerio de Traballos Públicos e Servizos do Goberno de Canadá. O equipo de colaboradores forneceu os termos equivalentes axeitados nas súas respectivas linguas, concretamente, en catalán, español, galego, italiano, portugués e romanés.

O Léxico panlatino dos biocarburantes pódese consultar de balde por Internet a partir de calquera dos idiomas incorporados, por exemplo, a partir do galego, de cuxa versión son autores membros do Grupo de Investigación en Tecnoloxías e Aplicacións da Lingua Galega da Universidade de Vigo. Tamén se pode descargar unha versión html.

Vocabulario panlatino das redes sociais

O Vocabulario panlatino das redes sociais contén 114 termos relacionados coas diferentes redes sociais, especialmente Facebook e Twitter como chiar, fío de discusión, meme, seareiro, etc. Cada termo presenta as denominacións equivalentes en seis linguas románicas (catalán, castelán, francés, galego, italiano e portugués, e tamén en inglés. Ademais fornécese as definicións en catalán e, nalgúns casos, tamén en castelán.

Elaborouse tamén no marco da Rede Panlatina de Terminoloxía (Realiter), que ten como obxectivo favorecer o desenvolvemento das linguas románicas. A proposta e coordinación do proxecto correspondeulle ao TERMCAT, o organismo catalán encargado da terminoloxía. Coma sempre nos vocabularios de Realiter, pódese consultar os termos por todos os idiomas incluídos, tanto na versión de texto como na de buscas. Ademais, tamén se pode descargar.

Da versión galega son responsables Manuel Núñez Singala e Xusto A. Rodríguez Río, do SNL da USC, e mais Sandra Romarís Hortas, do Centro de Estudos Galegos da Universidade do Algarve.