GCiencia, ciencia galega

O pasado 25 de novembro nacía GCiencia, que se presenta como “a web da ciencia galega”, xa que a súa intención é informar e divulgar a investigación que se fai en Galicia, achegar á sociedade a I+D+i e concienciar sobre a súa importancia para o desenvolvemento do país. Asemade e consecuentemente, pretenden reivindicar a calidade da comunidade investigadora galega, traballe en Galicia, no resto do Estado ou en calquera lugar do mundo, aínda que presta especial atención ás universidades e centros de investigación de Galicia.

GCiencia non é unha “revista científica”, é unha revista de divulgación, feita por xornalistas que contan a actividade investigadora e innovadora que se produce en Galicia. E fano mediante reportaxes, artigos e entrevistas, así como vídeos e tribunas de opinión. Os contidos non só son accesibles dende o web senón que GCiencia os populariza tamén a través doutras canles como as redes sociais (con especial incidencia os perfís de Facebook e Twitter), Youtube, etc. Ademais, é posible subscribirse.

Nestes case tres meses de vida, GCiencia publicou  máis de cen reportaxes, novas e achegas de opinión tratando temas diversos: a aposta galega polos coches intelixentes, as malformacións en mosquitos pola contaminación nos ríos galegos, a relación entre varamentos de mamíferos mariños e a sucesión de borrascas dos últimos meses, a catalogación das diferentes variedades de uva galegas, etc. Tamén fai unha aposta por dar a coñecer a historia da ciencia en Galicia, como a enciclopedia mecánica deseñada por unha ferrolá, que anticipa o libro electrónico, as descubertas pioneiras da oceanografía... Non só contidos estritamente científicos, senón tamén temas relacionados coa ciencia que responden ao interese social de explicar os beneficios  para a sociedade da I+D+i, o financiamento da investigación e a innovación, ou as fugas de talentos a outros países.

A publicación é trilingüe: as linguas básicas de publicación son o galego (maioritariamente) e o castelán, e algúns contidos estarán traducidos ao inglés. Eduardo Rolland, un dos directores, salienta que "Cando nos reunimos con científicos, insistíannos en que era fundamental que a páxina estivese en inglés. Non tanto polos científicos do ramo, que xa saben o que se move no seu campo, pero si por outro tipo de audiencia, sobre todo empresas de todo o mundo, que moitas veces descoñecen que en Galicia se están a investigar cousas que son importantes para eles, coma no caso da acuicultura", destaca. Non é desdeñable esta política lingüística no ámbito científico, tan falto de contidos na nosa lingua que normalicen a súa presenza. Por outra banda, a divulgación científica a través de Internet debe atender en maior medida á segmentación de públicos e aos diversos intereses que guían a investigadores e investigadoras.

O web estrutúrase en catro grandes áreas: Ciencia, Industria, Mar, Universidade, e ademais de Historias GC, que recollen perfís biográficos de científicos galegos do pasado, e a escolma de artigos en inglés. Para achegar a ciencia a todos os públicos, os contidos preséntanse de xeito ameno, próximo e mesmo divertido, mais non banal.

GCiencia quere ser un escaparate da investigación de Galicia cara ao mundo, se cadra comezando polo propio país, que en boa medida descoñece a súa actividade científica e de innovación. Que mellor que facelo, en boa medida, na propia lingua.