Termos esenciais de dereito civil

Termos esenciais de dereito civil é o cuarto volume da colección “Termos esenciais” dedicada especificamente ao ámbito do Dereito. Recompila 1270 conceptos propios do dereito civil, é dicir, do conxunto de normas que regulan as relacións xurídicas entre particulares: estado civil das persoas, matrimonio, herdanzas, patrimonio, contratos privados...

A diferenza dos anteriores volumes de termos esenciais, este ten a peculiaridade de incluír conceptos técnicos especificamente galegos. En efecto, mentres no dereito constitucional, penal e internacional se parte dunha conceptualización xurídica determinada pola lexislación estatal ou internacional, si existe un dereito civil galego, que sobreviviu malia que o Código civil español de 1888 impuña un mesmo dereito privado para toda España e que foi o piar para que en 1995 se ditara a primeira Lei de dereito civil de Galicia, que recoñece o costume como primeira fonte do dereito. Por iso, na árbore de campos que abrangue Termos esenciais de dereito civil, á par do dereito da persoa, dos dereitos reais, de sucesións, de familia, de obrigas, contratos e consumo, figura o dereito civil galego, campo ao cal corresponden termos como agra, augas de torna a torna, lugar acasarado, resío, testamento mancomunado...

Termos esenciais de dereito civil estrutúrase, como todos os glosarios da colección “Termos esenciais”, en dous grandes bloques. O primeiro, cerna do traballo, son propiamente os «termos esenciais», ordenados alfabeticamente pola súa denominación en galego, aos que se lles engade a correspondente información gramatical, a súa adscrición á árbore de campos do dereito civil e a as equivalencias en castelán.

O segundo bloque de Termos esenciais de dereito civil constitúeo o índice de denominacións españolas para eses 1270 conceptos, ordenadas alfabeticamente e que se numeran para remitir á denominación galega. Deste xeito, é doado acceder a toda a información deste glosario con independencia da lingua desde a que se inicie a consulta: se busca información sobre un concepto cuxo nome galego coñece, debe buscalo dentro do corpus de entradas dos Termos esenciais. Pola contra, se o dato de que parte a súa procura é un nome en castelán, debe dirixirse ao índice remisivo correspondente.

Termos esenciais de dereito civil pódese consultar na súa edición en papel, que se distribuirá entre o profesorado e o alumnado da Facultade e en formato .pdf, que permite manexalo en ordenadores e dispositivos de lectura electrónica. Ademais, a obra difúndese baixo a licenza Recoñecemento-NonComercial 3.0 de Creative Commons. Cómpre lembrar que bUSCatermos, a base de datos terminolóxica multilingüe en aberto da nosa universidade, incorpora toda a terminoloxía que abrangue este repertorio.

O novo repertorio terminolóxico presentouse o pasado 23 de abril nun acto desenvolvido na Facultade de Dereito, con presenza da secretaria xeral da USC, Lourdes Noya; o secretario xeral de Política Lingüística, Valentín García Gómez; o decano da facultade, Luis Míguez; o director do Servizo de Normalización Lingüística da USC, Manuel Núñez Singala, e a coordinadora da obra, Antonia Nieto Alonso, quen representou as nove profesoras e profesor de dereito civil que participaron na súa autoría: Marta Carballo Fidalgo, Ana Díaz Martínez, Isabel Espín Alba, Margarita Herrero Oviedo, Marta Madriñán Vázquez, Marta Otero Crespo, Ángel Luis Rebolledo Varela e a propia Antonia Nieto Alonso.

O glosario forma parte do plan de normalización da Facultade de Dereito Témoslle lei para aumentar e mellorar o uso da lingua galega no centro, dentro da liña de accións para resolver as dúbidas terminolóxicas que poidan dificultar o uso do galego por parte de docentes e estudantes, a cal xa deu pé á publicación dos termos esenciais de dereito constitucional, penal e internacional. Xa se está traballando no de administrativo e iniciando a planificación do de mercantil.