Manual básico de documentación administrativa e xurídica

Co Manual básico de documentación administrativa e xurídica, que se presentou ao público o pasado mes de abril, preténdese impulsar a modernización da lingua administrativa e xurídica galega, aumentar os recursos para a mellora da calidade formal e lingüística da comunicación administrativa e xurídica, e favorecer a formación en galego do funcionariado da Administración autonómica e de xustiza.

O proceso de actualización e modernización da xestión das administracións públicas ten unha vertente específica na adopción da denominada “linguaxe cidadá”, unha vontade de estilo propio guiado por criterios aceptados internacionalmente: a redacción simple, clara e ordenada destinada a acurtar distancias coa cidadanía e a promover na comunicación os valores de igualdade que a nosa sociedade posúe por dereito e reclama nos poderes públicos.

Non é a primeira achega da Xunta a este empeño democratizador; de feito, en 2004 publicara o Manual básico de documentos administrativos, que agora se actualiza e se inclúe neste, constituíndo unha das súas partes. Tamén outras institucións galegas andaron este camiño, como a propia USC, que xa en 1997 se destacou co seu Mellorando os servizos, agora dispoñible, actualizado, en versión web.

A Secretaría Xeral de Política Lingüística, en colaboración coa EGAP, editou 3.000 exemplares deste novo Manual, aínda que tamén está dispoñible libremente en PDF. O Manual básico de documentación administrativa e xurídica é froito dun traballo conxunto de lingüistas e xuristas, e estrutúrase en catro grandes apartados de contidos:

1 Guía rápida para a redacción administrativa e xurídica, concibida como unha lista de consellos para mellorar a redacción dos textos. Contra os erros máis frecuentes (linguaxe distante e discriminatoria, contidos desordenados, expresión confusa, redacción complicada, descoido e dependencia do modelo castelán, uso arbitrario dos recursos tipográficos) propón outras tantas pautas de mellora: democratización da linguaxe, organización da información, claridade e precisión expositiva, estruturación sintáctica, emprego correcto dos signos de puntuación e racionalización dos recursos tipográficos.

2 Modelos comentados de documentos administrativos. Axunta 24 modelos, organizados segundo un criterio de finalidade, que é o máis común e recoñecible por todo tipo de usuarios:

• Documentos de transmisión
• Documentos de xuízo
• Documentos de decisión
• Documentos de constancia
• Documentos da cidadanía

3 Modelos comentados de documentos xurídicos. Contén 16 documentos optimizados e organizados segundo a seguinte clasificación:

• Documentos de comunicación
• Documentos de constancia
• Documentos de decisión
• Documentos de formación de criterio
• Documentos de impulso procesual

Todos os modelos, independentemente das variacións que lles son propias, distribúen a información en tres partes (cabeceira, corpo e peche) con cadanseus contidos específicos. Deste xeito pódese recoñecer, alén das peculiaridades de cada documento, un esquema interno común que só varía como resultado das adaptacións mínimas ás características propias. Tratan a estruturación de cada documento e ofrece un catálogo de todos os posibles ítems, mesmo coas variacións que poden sufrir (de orde, de compoñentes...). Ademais, de forma complementaria engádense unha breve definición do documento, a súa caracterización tipolóxica e consideracións legais.

4 Bibliografía seleccionada de obras impresas e dixitais de interese para ampliar a nómina de recursos. Inclúe correctores automáticos, dicionarios e vocabularios electrónicos, tradutores ou repertorios de toponimia.
 

M ISABEL VAQUERO QUINTELA