Cursos intensivos de quince idiomas en xullo na USC

As persoas interesadas nalgún curso intensivo de idiomas que oferta este verán o Centro de Linguas Modernas da USC poden xa formalizar a súa matrícula a través de internet (e de maneira excepcional nas instalacións do propio centro en Santiago). O prazo remata o 25 xuño.
 
A oferta inclúe un total de 24 cursos de 15 linguas diferentes (alemán, árabe, catalán, checo, chinés, eslovaco, francés, grego moderno, húngaro, inglés, italiano, polaco, portugués, ruso e xaponés) que se desenvolverán en horario de mañá ou tarde desde o 9 ata o 20 de xullo nos campus de Santiago e Lugo. Trátase de cursos de 40 horas. Como novidade, incorpóranse cursos de linguaxe de signos e de preparación do exame oficial de xaponés NOKEN.
 
Os cursos diríxense principalmente a universitarios e universitarias que vaian estudar a unha universidade estranxeira cunha bolsa dos programas de mobilidade durante o curso 2012-2013, pero tamén están abertos a outras persoas con interese nesas linguas así como a estudantes de ensino secundario que cumpran ao longo de 2012 dezaseis anos. O alumnado de francés, inglés e alemán que ten que realizar a proba de nivel pode inscribirse nela ata o día 14 de xuño.

Créditos

A asistencia aos cursos poderá validarse con créditos, 2,5 de libre configuración para as titulacións non adaptadas ao Espazo Europeo de Educación Superior e 1 optativo nas que si o están sempre que o número de horas do estudo sume 80 e se teña a acreditación do B1 noutro idioma.

Centro examinador de xaponés

Como novidade, nas mesmas datas ofértase un curso intensivo de 20 horas para a preparación do exame oficial de lingua xaponesa NOKEN (Nihongo nōryoku shiken), que acredita o coñecemento do idioma xaponés en todo o mundo e é análogo ao exame CELGA para a lingua galega e ao DELE para a lingua española.
 
O primeiro centro universitario que acolleu este exame en España foi a Universidade Autónoma de Barcelona en 1972, á que lle seguiu en 1992 a Autónoma de Madrid. Agora, a partir de 2012, a Universidade de Santiago de Compostela convértese no terceiro centro examinador oficial en España coa autorización da Japan Foundation.